បិដក ភាគ ៤១ - ទំព័រទី ៥២

បុគ្គល​នោះ​ ​លុះ​ប្រមូល​មក​ ​នូវ​កាយសង្ខារ​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​ ​ប្រមូល​មក​ ​នូវ​វចីសង្ខារ​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​ ​ប្រមូល​មក​ ​នូវ​មនោ​សង្ខារ​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​ហើយ​ ​រមែង​ចូល​ទៅកាន់​លោក​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​។​ ​ផស្សៈ​ទាំងឡាយ​ ​ដែល​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​ ​រមែង​ពាល់ត្រូវ​នូវ​បុគ្គល​ ​ដែល​ចូល​ទៅកាន់​លោក​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​នោះ​។​ ​បុគ្គល​នោះ​ ​កាលដែល​ផស្សៈ​ ​ប្រកបដោយ​ទុក្ខ​ខ្លះ​ ​ឥតមាន​ទុក្ខ​ខ្លះ​ ​ពាល់ត្រូវ​ហើយ​ ​រមែង​ទទួល​វេទនា​ ​ប្រកបដោយ​ទុក្ខ​ខ្លះ​ ​ឥ​មានទុក្ខ​ខ្លះ​ ​មាន​សុខ​ ​និង​ទុក្ខ​ ​ច្រឡូកច្រឡំ​គ្នា​ ​ដូច​មនុស្ស​និង​ទេវតា​ពួក​ខ្លះ​ ​វិនិបាត​ពួក​ខ្លះ​^{(​១​)​} ​។​ ​ម្នាល​ភិក្ខុ​ទាំងឡាយ​ ​បុគ្គល៣ពួក​នេះ​ ​រមែង​មាននៅ​ក្នុង​លោក​។​ ​
​ [​២៤​]​ ​ម្នាល​ភិក្ខុ​ទាំងឡាយ​ ​បុគ្គល​ ​(​ជា​អាចារ្យ​)​ ​មាន៣ពួក​នេះ​ ​មាន​ឧបការៈ​ច្រើន​ ​ដល់​បុគ្គល​ ​(​ជា​សិស្ស​)​។​ ​បុគ្គល៣​ ​ពួក​ ​តើ​ដូចម្ដេច​។​ ​ម្នាល​ភិក្ខុ​ទាំងឡាយ​ ​បុគ្គល​ដល់​នូវ​ព្រះពុទ្ធ​ ​ជាទី​ពឹង​ ​ដល់​នូវ​ព្រះធម៌​ ​ជាទី​ពឹង​ ​ដល់​នូវ​ព្រះសង្ឃ​ ​ជាទី​ពឹង​ ​ព្រោះ​អាស្រ័យ​បុគ្គល​ណា​ ​ម្នាល​ភិក្ខុ​ទាំងឡាយ​ ​បុគ្គល​នេះ​ឈ្មោះថា​ ​មាន​ឧបការៈ​ច្រើន​ ​ដល់​បុគ្គល​នេះ​។​

---

ថយ | ទំព័រទី ៥២ | បន្ទាប់