បើបុគ្គលនោះ ប្រាថ្នាថា សូមឲ្យអាត្មាអញ បានចំពោះនូវការតាក់តែងឫទ្ធិ ជាច្រើនប្រការ។ បេ។ សូមឲ្យអាត្មាអញ អស់អាសវៈ ធ្វើឲ្យជាក់ច្បាស់ សម្រេចសម្រាន្តនៅ កាលបើហេតុមាន (បុគ្គលនោះ) រមែងដល់នូវភាពគួរជាបន្ទាល់ ក្នុងគុណនោះៗ មិនខាន។
ចប់លោណផលវគ្គ ទី៥។
ឧទ្ទាននៃលោណផលវគ្គនោះគឺ
និយាយពីកិច្ចដែលត្រូវធ្វើយ៉ាងរួសរាន់ ១ ការស្ងប់ស្ងាត់ ១ ធម្មចក្ខុកើតឡើង ដូចព្រះអាទិត្យ ក្នុងសរទសម័យ ១ បរិសទ្យ ៣ពួក ១ ភិក្ខុប្រកបដោយធម៌ ៣ ដូចសេះអាជានេយ្យ មាន៣លើក ១ បាបកម្មដូចជាអំបិល ១ គុណសម្បត្តិដ៏ខ្ពង់ខ្ពស់ របស់ភិក្ខុសង្ឃ ១។
ចប់ បណ្ណាសក ទី២។